CLICK HERE FOR BLOGGER TEMPLATES AND MYSPACE LAYOUTS »

السبت، 28 مارس 2009

قالو..فقلنا..على رأى المثل



جبتلكو بقة شوية أمثلة قديمة والأمثلة بتاعة شباب اليومين دول

وانتو بقة احكمو انهو أجمد؟؟

باتمنى تعجبكم


قالو:من طلب العلا سهر الليالى

قلنا:من طلب العلا يتفضل فى كبينة 4

قالو:اللى بيتة من ازاز ميحدفش الناس بالطوب

قلنا:اللى بيتة من ازاز مايغيرش هدومة فى الصالون

قالو:فاقد الشىء لايعطية

قلنا:فاقد الشىء يدور علية

قالو:اقلب القدرة على فمها تطلع البنت لامها

قلنا:اقلب القدرةعلى فمها يقع الفول منها

قالو:اللى ياكل لوحدة يزور

قلنا:اللى ياكل لواحدة يشبع

قالو:ياخبر النهاردة بفلوس بكرة يبقى ببلاش

قلنا:ياخبر النهاردة بفلوس بكرة ينزل علية اوكازيون

قالو:لاتبكى على اللبن المسكوب

قلنا:لاتبكى على اللبن فى البسكوت

قالو:رجعت ريما لعادتها القديمة

قلنا:رجعت ريما من عند خالتها فى مارينا

قالو:المركب اللى فيها ريسين تغرق

قلنا:المركب اللى فيها ريسين يلعبو طاولة

قالو:قالو للحرامى احلف قال جالك الفرج

قلنا:قالو للحرامى احلف قال وحياة قلبى وأفراحة

قالو:قال ياقاعدين يكفيكو شر الجايين

قلنا:قال يامحششين يكفيكو شر الكمين

قالو:اللى مايشفش من الغربال يبقى أعمى

قلنا:اللى مايشفش من الغربال يكشف نظر

قالو:الباب اللى يجيلك منة الريح سدة واستريح

قلنا:الباب اللى يجيلك منة الريح شيلة وركب قبنورى

قالو:رب صدفة خير من ألف ميعاد

قلنا:رب صدفة خير من ألف ليلة وليلة


هاه اية رأيكو بقة دلوقتى احنا ولا هما؟؟

9 اللى شرفونى:

مهندس / على درويش يقول...

السلام عليكم

طبعا البوست هايل

أحنا عايشين دلوقتي بس كلام زمان أحسن بكتير لأنه يحمل معني


أما نحن في هذا الزمن نحاول التمرد على الماضي فحاولنا تغيير المعني ولكن وللأسف غيرناه للأسوء


تحياتي

روح الاسلام يقول...

مهندس/على درويش
أولا أحب أقول لحضرتك ميرسى جدا على
مرورك الجميل لمدونتى المتواضعة دى
وباتمنى انها تكون عجبت حضرتك
ثانبا حضرتك فعلا عندك حق احنا
مانجيش حاجة قدامهم لكن انا منزلة
الموضوع دة لمجرد الكوميديا بس مش أكتر
ومرة تانية ميرسى جدا لحضرتك
وتحياتى لك

امل الاسلام يقول...
أزال المؤلف هذا التعليق.
امل الاسلام يقول...

هههههههههههههههههههههههه
والله ضحكتينى ياهند
ده احنا شقلبلنا الدنيا خااالص
بقينا ماشييين بالعكس
*كنت عاوزه اعلق بعد ماقلتيلى على طول بس انتى عارفه نظام الكبسان بقى*
جزاك الله خيرا ياقمر على الموضوع الجمميل ده

القلم السكندري يقول...

تختلف الأزمنة

فتختلف الثقافات والعقول

والأمثلة




ونحن ابناء اليوم :)


تحياتي

روح الاسلام يقول...

أمل الاسلام
ميرسى أوى يامريومة على التعليق
الجميل دة وباعدين يابنتى انتى عارفة
اننا مبوظين كل حاجة ياعنى هاتيجى
على دى ومانشقلبهاش هههههههههه
*أيوة طبعا عارفة النظام دة كويس
أوى وباعدين فيها اية يعنى لو
معلقتيش خالص انا مستحيل هازعل منك ياجميل*
لكن لما بتعلقى بجد بتفرحينى..ميرسى أوى يامريم

روح الاسلام يقول...

القلم السكندرى
تختلف الأزمنة

فتختلف الثقافات والعقول

والأمثلة
***********
جزاك الله خيرا يافندم على التعليق
وعلى الكلمات الجميلة دى
تقبل خالص تحياتى

مملكة الهدوء يقول...

ههههههههه
هههههههه
هههههههه
ههههههههه

لا موضوع بجد جامد



تحياتي

راء يقول...

بوست جامد موت
تحسيه لايت ودمه خفيف
بس العالم كله بيتغير مجتش ع الامثال يعني
تسلمي وتحياتي